L‘ustaria

In nossa chadafö brass‘e cousch’e buoglia. Las sosas sun fattas da nus da fuond sü. Cun far sü e sirup cumanzaina cur cha la bos-cha es in flur o cha la frütt’es madüra. Illa vaidrina sun tuortas fattas da nus, tuorta da nusch, tuorta da ponna, rasada da frütta o ün bütsch da tschiculatta laufoniensis – perche cha quels sun ils meglders. La carta da mezdi prevezza üna pitschna schelta da pasts simpels o ün toc chaschöl cun üna biera. Il pot da lantiglias impla darcheu il reservuar d’albumins e la liongia da tschiervi es tuot simplamaing buna. Per il giantar da dumengias faina reviver la tradiziun dal rost. La saira cuschinaina ün menü da quatter plattanzas sainza carta. Ingüna tscherna stantusa – Vus As laschaivat maladüsar da nus.

Nossa chadafö nu ha ingüns certificats. Mo nus ans dain tuotta  fadia da trattar las mangiativas cun la premura chi meritan. Il chaschöl vain da las alps e chascharias da qua. La charn cumpraina pro’l bacher dal lö o pro’l paur da la regiun. D’instà pudaina racoglier verdüra i‘l giardin da scoula be daspera – da valur pedagogica per ils scolars da l’internat – ed ün giodimaint culinaric per noss giasts.

La carta da bavrondas onurescha tant a Bacchus sco eir a Cere. Raritats dal Tirol dal Süd, il Magdalener sco algordanz’a mia nona, vins schelts dal Signuradi Grischun e vins gronds da l’Italia. Girun, biera da Tschlin, Calanda dal Grischun, las bieras da la Bieraria Appenzellaisa causa chi gustan bain e’l „Klosterbräu“ dad Ittingen es ün classiker. La carta da tès cuntegna preziusitats da ‚l’art du thé‘. Il cappuccino servina sainza puolvra da tschiculatta – sco in Italia, e l’espresso es ün süerv amabel cun üna taimpra da nusch.